മഹാരാഷ്ട്രയില്‍ സര്‍ക്കാര്‍ ജീവനക്കാര്‍ക്ക് പ്രവൃത്തി ദിനം ആഴ്ചയില്‍ അഞ്ച്

മുംബൈ: മഹാരാഷ്ട്ര സര്‍ക്കാര്‍ ജീവനക്കാര്‍ക്ക് പ്രവൃത്തി ദിനം ഇനി ആഴ്ചയില്‍ അഞ്ച് ദിവസം മാത്രം. മുഖ്യമന്ത്രി ഉദ്ധവ് താക്കറെയുടെ അധ്യക്ഷതയില്‍ ചേര്‍ന്ന നിയമസഭ യോഗത്തിലാണ് തീരുമാനം. പുതിയ തീരുമാനം ഫെബ്രുവരി 29 മുതല്‍ പ്രാബല്യത്തില്‍ വരും. എന്നാല്‍ തൊഴില്‍ സമയം ഏഴ് മണിക്കൂര്‍ 15 മിനുറ്റില്‍ നിന്നും എട്ട് മണിക്കൂറായി ഉയര്‍ത്തും.

ഇപ്പോള്‍ ജീവനക്കാര്‍ക്കുള്ള 288 പ്രവൃത്തി ദിനങ്ങള്‍ 264 ആയി വെട്ടിച്ചുരുക്കും. സംസ്ഥാനത്തെ ഒ.ബി.സി, എസ്.ഇ.ബി.സി, വി.ജെ.എന്‍.ടി വകുപ്പുകള്‍ ഇനി മുതല്‍ ബഹുജന്‍ കല്ല്യാണ്‍ വകുപ്പെന്നാണ് അറിയപ്പെടുകയെന്നും യോഗത്തില്‍ തീരുമാനിച്ചു. നിലവില്‍ മഹാരാഷ്ട്രയിലെ സര്‍ക്കാര്‍ ജോലിക്കാര്‍ക്ക് രണ്ടും നാലും ശനിയാഴ്ച്ചകളില്‍ അവധിയാണ്.

22 ലക്ഷം സര്‍ക്കാര്‍ ജീവനക്കാരാണ് സംസ്ഥാനത്ത് ആകെയുള്ളത്. രാജസ്ഥാന്‍, ബീഹാര്‍, പഞ്ചാബ്, ഡല്‍ഹി, തമിഴ്നാട് എന്നീ സംസ്ഥാനങ്ങളിലും സര്‍ക്കാര്‍ ജീവനക്കാര്‍ക്ക് അഞ്ച് ദിവസമാണ് പ്രവൃത്തി ദിനം.